Olegario percorre neste libro a súa vida e, espertando a memoria, regresa á aldea onde naceu e viviu como pastor nas terras altas de Caldelas, na serra de Mazaira para logo emigrar con dezaseis anos a Barcelona. Fala dos seus difíciles inicios como emigrante entre as ondadas dos que chegaron a principios dos anos 60 a Cataluña, e aínda dos diferentes proxectos empresariais que emprendeu, do seu incesante activismo a prol da cultura galega, da fundación da editorial Sotelo Blanco Edicións, no ano 1980, e até os días de hoxe. Sotelo Blanco Edicións, foi das primeiras editoriais independentes que se fundou en Galicia coa chegada da democracia. Ao longo de máis de corenta anos deu a coñecer a numerosos autores noveis e recuperou moitos clásicos, publicando centos de títulos de narrativa, poesía, teatro, así como tamén libros de texto. A querenza do editor foi, dende o primeiro momento, contribuír á difusión da literatura e da cultura galegas acollendo a maior pluralidade de voces e a procura da calidade literaria. Olegario Sotelo Blanco esparruña nas súas lembranzas e por este libro discorren vidas e persoas que protagonizaron os ambientes culturais e políticos da Galiza e tamén da Cataluña das últimas seis décadas.

 

— Sábado 12 de agosto, ás 18:30h, no antigo Hostal Blanco de Castro Caldelas. O antropólogo Manuel Mandianes presentará o libro en compaña do autor.